Kalingap Rab, Naging Emosyonal sa Hindi Pagbalik ni Brother Jose

Naging emosyonal si Rabboni James Matubang, a.k.a., Kalingap Rab habang bina-vlog ang naging desisyon ni Brother Jose tungkol sa hindi niya pagbabalik sa Team Kalingap. Matatandaan na "pinaalis" ni Kuya Val Santos Matubang si Brother Jose matapos nitong magpahayag ng saloobin sa isang isyu na pinatitigil nang pag-usapan pa ni Kuya Val na kinasangkutan ng isang sponsor ni Kalingap Rab.

Rabboni James "Kalingap Rab" Matubang

(Image from Kalingap Rab Facebook page)

Matapos hindi mapabilang sa grupo ni Kalingap Rab, ipinagpatuloy ni Brother Jose ang kanyang pagba-vlog. Sa halip na mga mukbang, naging content niya sa kasalukuyan ang pagtulong din sa mga nangangailangan ng tulong sa abot ng kanyang makakaya. Hindi niya nagawa ang ganitong klaseng content noon dahil ito ang nilalaman ng mga vlog ni Kalingap Rab. Hindi naman kasi maaaring iisa ang kanilang content.

May mga natuwa nguni't mas marami ang naunsyami nang biglaang nawala sa eksena si Brother Jose sa vlog ni Kalingap Rab. Nasanay na kasi silang kasa-kasama ang second-cousin ni Kalingap Rab sa mga misyon nito. "Very harsh" naman daw ang naging parusa ni Brother Jose gayong ang layunin lang niya sa kanyang vlog ay maayos ang lahat at irespeto ang kababaihan. May mga nagtampo rin kay Kalingap Rab dahil hindi niya napagtanggol si Brother Jose sa kanyang ama. Hindi rin kasi malinaw ang parusang tinanggap ni Brother Jose: kung ito ba ay pansamantala o permanente na.

Brother Jose and Kalingap Rab 

(Image from Brother Jose's Facebook page)

Sa pagkawala ni Brother Jose sa Team Kalingap at matuon sa charity ang kanyang vlog, biglang dumami ang kanyang mga subscribers at viewers. Hindi mapasusubalian na sanhi rin ito ng kanyang naunang exposure sa mga vlog ni Kalingap Rab. Gayunman, hindi rin mapasusubalian na may mga tao at sponsor na nakisimpatiya kay Brother Jose. 

Bakit nga ba hindi na bumalik si Brother Jose sa Team Kalingap?

Isa sa maaaring dahilan ay nahihiya na rin siyang bumalik pa. Umiiral na rin kasi rito ang pride at prinsipyo lalo na at mabuti naman ang iyong naging pakay noon. Marahil ay hindi niya napanood ang warning ni Kuya Val at nailathala na niya ang kanyang vlog tungkol sa kontrobersyal na isyu. Isa pang dahilan ay tumagal na ang kanyang "pagkakasibak" sa Team Kalingap at hindi maliwanag kung gaano katagal ang parusa at kung siya ay makababalik pa. Hindi rin naging maagap si Kalingap Rab sa pakikipag-usap sa kanya. Parang inisatpwera siyang bigla bilang pagsunod sa kanyang ama.

Marahil ay napagtanto ni Brother Jose na mas mainam kung magsasarili na siya upang maiwasan pa ang anumang isyu sa hinaharap. Hindi naman nangangahulugan nito na may napatunayan na siya sa sarili kaya ayaw na niyang bumalik pa. Bagkus, pinasalamatan niya si Kalingap Rab at Kuya Val Santos Matubang dahil sa mga naitulong ng mga ito sa kanya, lalo na at magkakamag-anak sila. 

Tiyak na marami na namang reaction video ang maglalabasan sa naging desisyon ni Brother Jose na huwag nang bumalik sa Team Kalingap. Tiyak na darami na naman ang mga bashers niya. Dahil dito, ang panalangin ko ay maging maayos na ang lahat. Respetuhin natin ang naging desisyon ni Brother Jose. Kung nagkamali man siya sa kanyang pagsasarili ay hayaan na lang natin na ang panahon ang makapagsabi. Ang mahalaga ay maipagpatuloy niya ang kanyang munting pagtulong sa ilan nating kababayan. 

Kay Kalingap Rab, maging aral nawa ang karanasang ito. Huwag itigil ang pagtulong sa ibang vlogger na magtagumpay rin. Magkaroon ng internal rules para maging maayos ang lahat. Ituring pa ring kaibigan at kamag-anak si Brother Jose upang muling manumbalik ang samahan kahit bilang indibidwal man lang at hindi na grupo. Maging matatag lalo na at nagbabalak ng bumuo ng pamilya.

Mabuhay ang Team Kalingap!

Panoorin dito ang pahayag ng mga sangkot tungkol sa isyu:

Ang vlog ni Kalingap Rab

Ang vlog ni Brother Jose

        

Papa Dan Matubang, Hihigitan Kaya ang Kasikatan ni Kalingap Rab?

         Mahihigitan kaya ni Papa Dan Matubang ang kasikatan ni Kalingap Rab? Ito ang katanungang gumugulo sa mga isipan ng mga subscribers, followers, at viewers ni Rabboni James Matubang o mas kilala sa kanyang YouTube account na Kalingap Rab. Ito ay matapos ipakilala ni Rab ang kanyang pinsan na si Dan o Papa Dan, anak na kapatid na lalaki ni Kuya Val Santos Matubang, sa kanyang mga video nang bumisita sila sa iba't ibang lugar sa Maynia kamakailan at maging nang bumalik ang Kalingap Team sa Bicol.

        Sa aking mananaliksik, ang tunay na panagalan pala ni  "Papa Dan" ay Daniel Glenn Matubang. Ipinakikilala siya bilang Papa Dan ni Kalingap Rap dahil hango ito sa kanyang unang pangalan na Daniel.  Ang mga larawan na nasa blog na ito ay hango sa mga photos ni Glenn Matubang sa kanyang Facebook page. 

Papa Dhan (Glenn Matubang) at Kalingap Rab

        

        Ayon sa kanyang FB profile, Si Daniel o Glenn ay nagtatrabaho bilang Marketing Professional sa Toyota - Pasig. Nag-aral siya sa National Teachers College at sa Central Colleges of the Philippines. Sa kanyang Instagram account, sinabi ni Papa Dan na "The greatest tragedy in life is not Death but a LIFE WITHOUT PURPOSE and our purpose in life is found in Jesus." Nagpapahayag ito na siya ay relihoyosong tao. Kita rin sa kanyang tatto ang malaking paniniwala sa Diyos.

        Kung ako ang tatanungin, malaki ang potensyal na sumikat din bilang vlogger si Dhan o si Glenn kung ito ay kanyang papasuking larangan dahil na rin sa angkin niyang kakisigan at kaguwapuhan. Tulad ni Kalingap Rab, mapusyaw rin ang kulay ng kanyang balat, maliban pa sa inosenteng mukha. Sa pagsama-sama niya sa mga lakad ni Kalingap Rab, marami siyang matutunan sa pagiging mabisa at magaling na vlogger. Sa bagay, ang kailangan  lamang naman upang maging matagumpay na YouTube vlogger ay dedikasyon, sipag, tiyaga, at pagiging totoo sa sarili na  makatulong. Nakatutulong man, hindi naman kailangang maganda o guwapo ka upang sumikat. Kailangang mapukaw mo ang mga manonood na panoorin ang iyong mga video at hintayin ang susunod mo pang gagawin. Maliban sa pakikiisa nila sa iyong mga karanasan, kailangan din ng mga manonood na matuto sa buhay at magkaroon ng kasiyahan matapos nilang panoorin ang iyong bidyo.

        Sa palagay ko ay malayo rin ang mararating ng YouTube channel ni Papa Dhan kung uumpisahan niya ito. Ano man ang kanyang maging content, kailangan lang niya ang maging totoo sa mga nanonood dahil sa kanila nakasalalay ang kanyang tagumpay. Nawa ay lubusan siyang magkaroon ng sapat na kaalaman mula kay Kuya Val, Ate Edna, Kalngap Rab, at sa iba pang Kalingap Team at Partners.

        Mapapanood dito https://www.youtube.com/watch?v=aEqxpty4nD8 ang video ni Papa Dhan nang ipakilala siya ni Kalingap Rab kina Bumbay at Arjun.

        Kay Papa Dhan, "Good Luck and God Bless!"

--o0o--

Charity Vloggers sa Pilipinas, Dumarami

        Dumarami ang mga charity vloggers sa Pilipinas. Sila 'yong mga YouTube vloggers na namamahagi ng tulong pinansyal at/o materyal sa ating mga kapuspalad na kababayan buhat sa kanilang sariling bulsa o galing sa kinita nila sa YouTube. Hindi ko batid kung sino ang nagsimula ng trend na ito subali't dumarami ang subscribers, followers, at viewers ng mga vloggers na may ganitong tema.

        Ang ilan sa mga charity vloggers na pinapanood ko ay kinabibilangan nina Kuya Val Santos Matubang, Kalingap Rab, TechRam, Pobreng Vlogger - Archie Hilario, Jose Hallorina, Virgelyncares 2.0., Pugong Biyahero, Kingluckss, atbp.  Ang iba ay nagbibigay rin ng tulong sa mga mahihirap subali't hindi talaga ito ang tema ng kanilang vlog. Kabilang sa mga grupong ito sina Raffy Tulfo in Action, Hungry Syrian Wanderer, Japer Sniper, Ivana Alawi, Harabas, Macki Moto, atbp. Ipinabahagi lang ng mga vloggers na ito ang parte ng kanilang mga kinita sa mga mahihirap.

Techram (Ramil Manalastas)

       Dahil sa pagdami ng mga subscribers at views ng mga charity vloggers, naiinganyo rin ang iba na ito ang gawin nilang tema. Dahil maraming subscribers at views, marami rin ang kikitain ng isang vloggers. Sa totoo lang, pangunahing layunin ng isang vlogger ang kumita kahit papaano dahil hindi naman madali ang mag-vlog. Pinagtutuunan ito ng salapi, oras, at panahon. Kapareho na rin ito ng isang taong pumapasok sa opisina o pabrika dahil ang pagba-vlog ay isa na ring hanapbuhay.

 (Image from YouTube)

        Matatandaan na kaya biglang dumami ang subscribers ni Virgelyncares 2.0 ay dahil sa kaniyang vlog tungkol kay Mura Padua. Nag-trending ito nang humingi siya ng tulong sa kanyang kaibigang si Mahal (RIP). Dumami rin ang mga subscribers nina Kuya Val at Kalingap Rab nang i-feature nila si Christian, ang dating taong grasa na natagpuan ng mga kamag-anak. Ito rin ang dahilan kung bakit luminya na rin sa charity vlog si Kabusiness na dati ay nagtitinda lang ng mga makinang panahi at tutorial ang tema ng kanyang vlog. 

(Image from YouTube)

        Kung tutuusin ay iisa lang ang content ng mga charity vloggers pero bakit umaangat kaagad ang iba kumpara sa ilan? Sa aking palagay ay nasa dedikasyon ang isa sa mga dahilan. Pangalawa, dapat ay nasa puso talaga ang pagtulong. Ang unang layunin ay makatulong at hindi upang dumami ang views at kita. Pangatlo, dapat ay hindi scripted ang ginagawang pagtulong at pagbibidyo. Sa aking mga napapanood, nararamdaman kung scripted ang ilan sa mga ito. Ibig sabihin, may sinusunod na script o istorya ang vlogger at ang tinutulungan. Lumalabas tuloy na hindi natural ang mga emosyon ng mga tinulungan at tumutulong. Kung baga, hindi nakaaantig ng damdamin ng mga nanonood at ng potensyal na mga sponsors. Kapag natural ang pagtulong at walang sinasaulong sasabihin ang tinutulungan, mararamdaman mo ang kanilang mga emosyon. 'Yong iba kasi ay pinagmumukha pang kaawaawa ang isang tutulungan na hindi naman talaga ganoon kagrabe ang kalagayan. Mahahalata mo  rin sa ibang charity vloggers na hindi tumataas ang subscribers at views ay ang layunin nilang kumita. Mas nakapokus sila sa madaragdag na subscribers, viewers at kita. Mapapansin ito sa mga vloggers na nakikipag-collab sa mga sikat nang charity vloggers. Binibisita nila ang mga ito upang mahikayat ding mag-subscribe sa kanila ang mga subscribers at sponsors nito. Sa palagay ko ay hindi epektibo ang ganitong istratehiya. Nanonood ang isang viewer dahil sa content at sincerity ng isang vlogger. Nais ng manonood ang sumaya, matuto, at makiisa sa karanasan ng vlogger at ng mga nakapaligid sa kanya.

        Sa mga nagnanais na maging charity vlogger, isapuso na pagtulong talaga ang una ninyong layunin. Ang premyo ay darating sa araw na hindi ninyo inaasahan. Maging natural at totoo. Sinceridad ang susi ng tagumpay.

Nakatutulong ba o Nakapeperwisyo ang mga Kalingap Partners kay Kuya Val Santos Matubang at Kalingap Rab?

        Nakatutulong ba o Nakapeperwisyo ang mga Kalingap Partners kay Kuya Val Santos Matubang at Kalingap Rab? 

        Iyan ang tanong na namumutawi sa aking isipan bago ko isulat ang blog na ito. Mahigit isang taon na nang maging silent viewer ako ni Kuya Val Santos Matubang. Ito 'yong panahong halos lahat ng tao sa buong mundo ay hindi makalabas ng bahay dahil sa pandemyang dulot ng Covid-19. Dahil laging nasa loob ng bahay o bakuran, isa sa napaglibangan ay ang panonood ng YouTube. Isa nga sa aking napili ay ang vlog ni Kuya Val.

        Dati ay  iilan lang ang kasama ni Kuya Val sa kanyangg misyong makatulong sa mga seniors citizens at sa mga tunay na naghihikahos sa buhay. Sina Atorni Franklin at Engr. Agul ang lagi niyang kasa-kasama. Sa pagsisimula ng kalahatian ng taon ay dumami na nang dumami ang naging kasama ni Kuya Val sa kanyang misyon maliban pa sa kanyang anak na si Kalingap Rab, (na nagresign pa sa kanyang trabaho noong isang taon para makatulong sa kanyang ama), at maybahay na si Ate Edna. Ito ay bunsod na rin sa panawagan ni Kuya Val na tutulungan at ime-mentor niya ang mga small YouTube bloggers.

        Sa simula ay naging maayos naman ang lahat. Nasa background lang ang mga vloggers na tumugon sa panawagan ni Kuya Val. Kasa-kasama man sa mga misyon ay tahimik lang sila. Dahil sa pagdami ng mga nais maging charity vloggers na katuwang ni Kuya Val, nagkaroon ng mga kategorya ito. Category A yaong mga naunang vloggers at nakatutulong nang malaki sa adhikain ni Kuya Val.

        Nagsimula ang kaguluhan nang magkaroon na ng pagkakataon ang ilang vloggers na mag-post na rin ng kani-kanilang reaction video hinggil sa mga pabahay at feeding programs ni Kuya Val. Healthy naman ito dahil lalo pang lumaganap ang ginagawang kabutihan ni Kuya Val at dumami ang kanyang mga subscribers at sponsors. Ngunit kalaunan, nagkaroon na ng iringan at inggitan sa pagitan ng mga vloggers na kinupkop ni Kuya Val. Ang ilang mga reaction videos ay hindi na nakapokus sa mga misyon kundi sa personalidad na ng mga vloggers. Dagdag pa rito, pati mga sponsors ay nakilahok na rin sa mga balitaktakan. Nagbigay na rin sila ng kani-kanilang kuro-kuro at pala-palagay kahit hindi na nila lubos alam ang tunay na pangyayari at dahilan. Ito ang sanhi kung bakit maraming bashers ang naglabasan sa Facebook page ni Kuya Val.

        Nitong huli nga ay isang sponsor ni Kalingap Rab ang naging tampulan ng pagba-bash, hindi lamang ng mga viewers at subscribers nina Kuya Val at Kalingap Rab kundi pati na rin sa hanay ng mga vloggers na nasa poder ni Kuya Val. Dahil dito, nagkaroon ng grupo-grupo sa Kalingap community. Nagkampi-kampihan ang isa't isa. Ito ang naging sanhi kung bakit, pagkatapos ng birthday ni Kuya Val ay may nag-alisang Category A vloggers sa Kalingap quarters. Ito ay sinundan ng iba't ibang reaction videos mula sa iba't ibang vloggers. Natuon ang content ng mga vloggers na ito sa isyu, tsismis, o problema at hindi na sa misyon ni Kuya Val.

        Dahil sa "kaguluhang" ito, nagre-act din ng kani-kanilang saloobin ang mga viewers at subscribers. Naunsyami ang iba, ang ilan ay nag-unsubscribe na. Dahil dito naapektuhan din ang bilang ng viewers at revenue ng mag-ama. Nagbabala si Kuya Val sa kaniyang live stream na kung nais ng isang kalingap team na gumawa ng reaction video tungkol sa isyu, kailangang umalis muna sila sa team. Pinapapayagan silang magsalita, tagapagtanggol man ng isang panig o kalaban, dapat lang ay bilang isang personalidad at hindi bilang isang grupo.

                                                        Brother Jose

        May nakinig naman sa panawagan ni Kuya Val. Ang iba ay nanahimik at ang ilan ay pansamantala munang umalis sa bahay ni Kuya Val. Isa sa hindi napigilan ang maglabas ng saloobin tungkol sa isyu ay si Brother Jose. Maganda naman ang kaniyang sinabi sa kanyang live vlog noong November 26, 2021 na umani ng 75k+ views subali't dahil sa tayming ng kanyang pahayag ay nagdesisyon si Kuya Val na tanggalin muna siya sa team ni Kalingap Rab. Inayunan naman ni Kalingap Rab ang naging desisyon ng kanyang ama kaya nasuspinde si Brother Jose. Sa kanyang vlog noong November 28, 2021, humingi na si Brother Jose ng paunmanhin sa sinumang nasaktan sa kanyang naging pahayag. Nilinaw niya na hindi siya nagtatanggol ng isang sponsor bagkus ay pangkalahatang pakiusap ang kanyang layuning irespeto ang kababaihan. Dahil dito ay maraming viewers ang humanga sa tapang ni Brother Jose at nakakuha ito ng 75k+ viewers, wala pang isang araw nang ito ay mailathala.

        Dahil sa pangyayari sa itaas, napagbuod ko na hindi nakatutulong kay Kuya Val Santos Matubang kung mga vloggers din ang kasama sa kanyang kalingap team. Sa kagustuhan kasi ng ilan na tumaas agad ang kanilang subscribers at viewers ay mga isyu at problema ang kanilang pinagtutuunan ng pansin sa halip na ang content ng kanilang mga vlogs ay ang misyon ng pagtulong. Dahil sa kanilang reaction videos, nalalaman pa tuloy ng mga viewers at subscribers ang mga problema sa loob ng kalingap quarters. Pinalalaki nila ang isang usok lang. Ginagawang sensational ang munting isyu na ang layunin ay makahatak lang ng viewers. 

        Sa aking palagay ay may mga volunteers naman ang handang tumulong kay Kuya Val sa kanyang mga misyon. Kung hindi mapipigilan ang mga vloggers na handang magpa-mentor, dapat ay magkaroon ng rules of mutual understanding na nagsasaad ng kung ano lang ang kanilang dapat gawin habang sila ay nasa pangangalaga ni Kuya Val. Kapag sila ay sumuway sa kautusan, dapat silang umalis upang hindi maapektuhan ang pangalan ni Kuya Val, Kalingap Rab, at Ate Edna.

        Nawa ay maging maayos na ang gusot sa kalingap partners at kalingap team. Nanghihinayang ako kay Brother Jose subali't sa palagay ko ang mas aangat ang kanyang channel dahil sa kanyang paninindigan. Kailangan siya ni Kalingap Rab.

    ========    

Para sa buong video ni Brother Jose, i-klik ito ==>   https://www.youtube.com/watch?v=Q7VKmylcpSs

    

Mga Taong Grasa, Nawawala sa Lansangan Dahil sa mga Vloggers

Nawawala sa  lansangan ang karamihan sa mga tinatawag  na "taong grasa" dahil sa mga vloggers na nais silang "sagipin". Mapapansin na kadalasan sa mga nagte-trend ngayon at umaani ng libo-libo kundi man milyon-milyong views sa YouTube ay may kinalaman sa mga natutulungang mga tao sa lansangan na may dipresensya sa pag-iisip kung hindi man hirap na hirap sa buhay.

(Image from http://gwincheese.blogspot.com)

Nagsimula ang kalakarang ito nang magtuunan ng pansin ng mga charity vloggers na kinabibilangan nina Techram, Hungry Syrian Wanderer, ForeignGerms, Val Santos Matubang, Kalingap Rab, Pugong Byahero, at marami pang iba, ang mga taong ito. Dahil sa kanilang mga video ay natagpuan ng mga kaanak ng mga taong grasang ito. Gayundin, marami sa kanila ang unti-unti kundi man lubusang gumaling sa kanilang sakit.

"Techram" Manalastas

Nakatutuwa ang pangyayaring ito dahil nabibigyan ng tulong ang ating mga kaawaawang kababayan na naging tahanan na ang lansangan. Kung hindi sila napag-uukulan ng sapat na pansin ng pamahalaan, mayroon naman tayong mga vloggers na handa silang tulungan.

                                Kalingap Rab at Kuya Val Santos Matubang

Dahil umaani ng maraming views na may katumbas na salapi ang mga bidyong ito, lalo pang dumami ang mga vloggers na nagnanais makahanap ng mga taong grasa at mga pulubing naglipana sa kalsada. Ang lahat ay handang tumulong kapalit ng salaping maitutulong pa nila sa iba. 

Basel Manadil "Hungry Syrian Wanderer"

Sana naman ay hindi lang panandalian lang ang hangaring ito ng mga YouTube vloggers. Nawa ay panmatagalan ang kanilang adhikaing ito upang tumulong. Hindi sana nakatuon sa dami ng views ang kanilang pagtulong kundi bukas sa kanilang puso. Sana ay ipagpatuloy pa nila ang kanilang nasimulang gawain nang walang hinihinging kapalit.

Paul Joseph Tesalona "Pugong Byahero"

Kung tuluyan mang mawala sa mga lansangan sa buong Pilipinas ang mga taong grasa ito ay dahil sa mga vloggers na binibigyan sila ng pag-asang mamuhay nang normal. Hindi po sila kinidnap ng mga taong nasa loob ng van na puti na nais ipagbili ang kanilang mga laman-loob. Gayunman, sana ay magising ang ahensya ng pamahalaan na siyang natukahan upang bigyang solusyon ang problemang ito.

Lola Damiana, Sumuko na sa Laban

Sumuko na sa laban ang "Pambansang Lola" ng Kalingap Team na si Lola Damiana. Ito ang hatid ng Facebook post ni Kalingap Rab ngayong araw na ito, Setyembre 22, 2021. Ito ang kanyang munting pahayag sa pagpanaw ni Lola Damiana:

"Nakakalungkot na balita. Lola Damiana pumanaw na. Maraming salamat sa maliligayang ala-ala na iyong iniwan sa amin. Mananatili kang pambansang lola namin. Mahal ka namin Lola Damiana. Mamimiss ko kulitan natin."

 (Image from Kalingap Rab Facebook's page)

Dumagsa ang nagpahatid na pakikiramay sa pamilya ni Lola Damiana, gayundin ang magagandang salitang ipinahayag sa kanya dahil sa aliw at sayang naihatid sa kani-kanilang buhay sa panahong ito ng pandemya.

Simula't sapul ay pinapanood ko na ang mga vlogs nina Kuya Val Santos Matubang at ni Kalingap Rab tungkol sa buhay-buhay ni Lola Damiana - magmula ng pagiging masungit nito hanggang maging masayahing lola ang matanda at magkaroon ng simpleng bahay. Hindi ko alintana ang karamdaman niya sa pag-iisip dahil hindi naman siya nananakit bagkus ay nagbibigay payo pa kung magkaminsan. 

Dahil kay Lola Damiana ay naipagpatayo rin ng sari-sariling bahay ang kanyang dalawang anak na sina Kuya Raymundo at Kuya Bernie. Kung may samaan man ng loob ang dalawang magkapatid, sana ay mawala na ito para na rin sa ikatatahimik ng kaluluwa ng kanilang ina.

Sa ngayon ay wala pa akong nakakalap na balita kung ano ba ang dahilan ng pagkamatay ni Lola Damiana. Sa isang vlog ni Kalingap Rab ay napansin ko na ang pananamlay ng matanda. Hindi ito makakain at tila walang panlasa. Dahil dito, ayoko mang isipin ay baka 'ikako sa Covid-19 namatay ang matanda dahil na rin sa isang vlog ni Kalingap Rab ay maraming mga kapitbahay ng matanda ang nanghihinging sa kanya ng pambili ng gamot sa trangkaso.

(Image from Kuya Val's Facebook page)

Kung Covid-19 nga ang ikinamatay ng matanda, dapat ay ibayong ingat ang gawin ng mga nagba-vlog. Kapag matatanda at may karamdaman ang kanilang kakapanayamin, dapat siguro ay may "negative result" sila ng Covid-19 bago mag-interview lalo na't mahina sa sakit ang ganitong mga tao. Dahil sa daming nagpupunta sa bahay nina Lola Damiana, maaari mong isipin na baka mayroon sa kanila ang nakahawa sa matanda. 

Ang Covid-19 ay isang sakit na ikinahihiyang malaman ng iba. Isa itong dahilan kung bakit lalong dumarami ang nahahawa. Ang malaking gastos sa check-up at pagpapagamot ay iba pang dahilan kung bakit bantulot ang mga may karamdaman na magpakonsulta sa mga doktor at magpunta sa mga ospital at klinika. Kung libre sana ang magpapa-test at susunod sa mga health protocols, sa palagay ko ay hindi lalaganap ang sakit na ito sa Pilipinas.

Ano-ano ang natutunan natin sa pagkamatay ni Lola Damiana?

Una, parang iglap lang ang buhay. Ang dating masayahin at malakas sa ngayon ay maaaring lugmok na kinabukasan. Dahil dito, ipakita na natin at ipadama sa ngayon ang ating pag-ibig sa ating mga mahal sa buhay.

Pangalawa, kung sa Covid-19 pumanaw ang matanda, nagpapatunay lamang ito na ang sakit na ito ay totoo at nakamamatay. Bakuna lamang ang tanging paraan sa ngayon upang mapaglabanan natin ang sakit.

Pangatlo, kahit may kapansanan sa pag-iisip ang isang tao, hindi nangangahulugan na siya ay wala nang silbi sa mundo. Sa kanyang paraan, naipakita ni Lola Damiana na kaya niyang pasayahin at patawanin ang libo-libong manonood nina Kuya Val at Kalingap Rab.

Pang-apat, tuloy pa rin ang buhay. May isa pang Lola Damian na darating sa ating buhay na nagbibigay sa atin ng ngiti at saya hangga't nariyan sina Kuya Val Santos Matubang, Kalingap Rab, at iba pang charity vloggers na handang tumulong at ibahagi ang kanilang pagmamahal at yaman nang walang hinihinging kapalit.

Kay Lola Damiana, sumuko ka man sa laban ay tuloy pa rin ang ating pakikibaka upang makamtan ang tunay na mukha ng pag-ibig at kapayapaan!

BumYang – Umaarangkada ang Love Team

Umaarangkada ang “love team” nina Bumbay at Oyang sa YouTube matapos i-feature ito ni Kalingap Rab sa kanyang YouTube channel. Sa ngayon ay pangalawang “date” na ang nangyari sa dalawang teenager na parehong tinutulungan ni Val Santos Matubang. Sa kasalukuyan ay may binabayarang tutor si Kalingap Rab upang tulungang magbasa si Bumbay, na nakatapos lamang ng Grade 2. Si Oyang naman ay binibigyan naman ng regular na tulong ni Kuya Val.

Hindi ko alam kung saan hahantong ang “love team” na ito dahil sa ngayon ay “pure friensdhip” lang talaga ang namamagitan sa dalawa. Sana ay lumawig pa ang kanilang samahan upang mapasaya ang mga subscribers at nanonood ng mga video ni Kuya Val Santos Matubang at anak nitong si Kalingap Rab.

Panoorin ang "second date" ng Bumyang DITO:

Ang mga larawan ay mula sa YouTube channel ni Kalingap Rab.