Kalahating Milyon Nga Ba ang Dahilan Kung Bakit Bumitiw si Hitobeer kay Macki Moto?

Totoo nga bang kalahating milyon ang dahilan kung bakit  "umalis" na rin sa poder ni Macki Moto si Hitobeer? Ito kasi ang usap-usapan na lumalaganap sa social media matapos mawala sa mga vlog ni Macki Moto si Hitobeer magmula ng kalahatian ng Disyembre 2021. Inisip ng ilan na baka inalok din si Hitobeer ng P500,000.00 tulad ng pag-aalok diumano kay Miguelito upang tuluyang kumalas kay Macki Moto at tinanggap ito ng una.

Hitobeer

(Image from his Facebook page)

Sa isang vlog, nais ni Black Shadow na ihayag ni Miguelito ang pangalan ng sinumang nag-alok sa kaniya o anumang ebidensya na magpapatunay na inalok nga siya at tinanggihan niya ang offer. Parang lumalabas kasi na kaya umalis ang mga dating kaibigan ni Macki Moto ay sa kadahilanang may tinanggap silang pera, na mariin namang pinabubulaanan naman ni Black Shadow at ng Tropang Solid dahil wala naman silang sinabi upang pag-ukulan ng ganoong kalaking halaga ng sinuman.

Dahil biglaan din ang pagkawala ni Hitobeer sa mga vlog ni Macki Moto, marami ang nagtatanong ng dahilan kung bakit. Siya ba ay umalis o pinaalis? Pinayuhan kaya siya ng kanyang pamilya na kumalas na rin sa poder ni Macki Moto ganoong kasangga pa rin siya nito nang panahong nawala ang ibang Tropang Bukid. Dati-rati ay very close sina Mrs. Macki Moto at Mrs. Hitobeer, ano ang nangyari? Si Mrs. Macki Moto kaya ang dahilan kung bakit nagkawatak-watak ang Tropang Bukid?

Kung wala talagang ginawang pagkakamali si Macki Moto at/o ang kanyang asawa, bakit maraming vloggers ang biglang dumistansya sa kanila? Bakit pati ang ina at mga kapatid ni Macki Moto ay hindi nakikitang kasama siya sa mga okasyon?

Anuman ang nangyari sa nakaraan ay hindi na mababago pa pero maaayos pa sa hinaharap ang anumang tampuhan o samaan ng loob na naganap. Dapat ay mag-usap-usap ang lahat ng kasangkot upang matapos na ito. Hindi lang ang Tropang Bukid ang hindi mapakali gayundin ang mga viewers at subscribers nila. Sana ay maayos na ito.

Sino ang Bagong Cameraman ni Macki Moto?

Naging usap-usapan at naging hulaan kung sino ang bagong cameraman ni Macki Moto. Ito ay matapos na ipahayag ito ni Macki Moto sa kanyang nakaraang vlog.

Bilang isang subscriber ni Macki Moto, isa rin ako sa mga humuhula kung sino nga ba ang kanyang bagong tagakuha ng bidyo matapos niya ipakita ang mga paa nito.

Sa aking palagay, ang bagong cameraman ni Macki Moto ay walang iba kundi si M.Y Empi. Nabuo ito sa aking isipan nang makita kong tumira rin si M.Y Empi at ang kanyang partner sa isa sa mga apartment kung saan nakatira rin sina Macki Moto at Hito Beer. Sabagay, hindi naman nawala ang pagkakaibigan ng dalawa dahil noong panahong nagkahiwalay-hiwalay na ang Tropang Bukid, nasa bidyo pa rin si M.Y Empi, Miguelito, Father, at Hito Beer.

Kung mali man ang hula ko ay hayaan na. Hula lang naman ito. Kung sakaling hindi nga si MY Empi ang bagong cameraman ni Macki Moto, nangangahulugan nito na baka nga may lamat na ang kanilang pagkakaibigan lalo na at magkapitbahay na nga sila.

Napansin ko rin na tila hindi na nakakasama sa vlog ni Macki Moto si Hito Beer. May alitan na nga kaya sila? Napansin ko rin kasi na ang kasa-kasama na ng misis ni Hito Beer ay ang partner ni MY Empi samantalang doong dati ay ang kasama nito ay si Mrs. Macki Moto. Hindi ko tuloy alam kung sino talaga ang kontrabida? Si Macki Moto o ang kanyang misis. Kung sinuman, sana ay matuldukan na ang kanilang mga samaan ng loob para maging happy na ang lahat. mahirap kasi iyong may mga taong iniiwasan mo. Hindi rin kasi masaya kung may mga taong may galit sa iyo sa kabila ng iyong tagumpay. Hindi kumpleto ang lahat kung wala sa tabi mo ang iyong pamilya at mga kaibigan.

Macki Moto, Iniiwasan nga ba ng ibang Vloggers? | May "Something" Ba Sila ni Mamu Delia?

         Iniiwasan nga ba ng ibang mga vloggers  si Macki Moto lalo na yong mga nakabase sa Arayat, Pampanga at Cabiao, Nueva Ecija? 

                                (Image from Pretty Cel's YouTube channel)

        Ito ang umuugong sa social media matapos nilang mapanood ang pagtitipon ng mga YouTube vloggers na dating close kay Macki Moto. Napansin kasi ng mga subscribers at viewers na wala ni anino ni Macki Moto sa mga kasayahang ito na naganap lamang noong isang linggo, lalo pa at isa siya sa mga itinuturing na sikat at pamosong vloggers sa kanilang lugar. 

        Dahil dito, nakabuo tuloy ang iba ng mga haka-haka na hindi lamang sa kanyang pamilya may "something" si Macki Moto kundi maging sa iba pang mga vloggers. Lalo tuloy naging interesado ang mga "Marites" na alamin ang katotohanan kung bakit tila inabandonado, initsa-puwera, o iniiwasan si Macki Moto ng ibang vloggers.

        Nakalulungkot lang isipin na dati-rati ay napaka-close ni Macki Moto sa mga vloggers na ito. Sa isang pagtitipon na idinaos sa bahay ni Mamita in America, dumalo roon sina Mamu Delia, Kafarmer, Ate Rowena, JimmySpeaks, maliban pa sa ina ni Macki Moto na si Mommy Moto, bayaw at kapatid na sina Kian at Sarah. 

        Sa isang vlog ni Black Shadow in the Night, nakita rin doon sina Mamu Delia, Mommy Moto, Kian and Sarah, MY Empi, Mamita, at iba pa. Kung walang "something" si Macki Moto sa mga vloggers na ito, dapat ay naroon siya. Lumakas tuloy ang hinala ng mga viewers may "something" talaga si Macki Moto sa ibang miyembro ng Tropang Bukid, sa kanyang ina, bayaw, mga kapatid, at ibang vloggers. Maaari rin namang isipin na kaya hindi nakasama si Macki Moto sa mga kasayahang ito ay dahil may mga dumalo roon ang ayaw niyang makita.

        Kung anuman ang tunay na dahilan ng mga pangyayari ito o kung may "something" nga siya sa ibang vloggers o kapamilya, nawa ay maresolba na ito sa lalong madaling panahon. Sana ay magkabati-bati na sila upang maging smooth ang kanilang pagba-vlog sa araw-araw. Alam kong hindi madaling makalimot, maalis kaagad ang sama ng loob, at makapagpatawad, subali't paano ka makahihingi ng biyaya sa Diyos kung may dinadala ka sa iyong puso. Paaao ka Niya mapapatawad kundi hindi ka marunong magpatawad ng kapwa. Sana ay maging happy-happy na ang lahat sa mga susunod na mga araw.

#MackiMoto  #MamuDelia #KianAndSarah #MYEmpi #KalingapRab 

#TechRam #ValSantosMatubang #Harabas

--o0o--

Ano ang Kabila ng Masayang Ngiti ni Macki Moto?

         Masasabing isa si Mark Joseph Cunanan a.k.a Macki Moto sa mga matagumpay na vlogger sa Pilipinas. Sa umpisa ay mabagal ang paglago ng kanyang YouTube channel subali't dahil sa tiyaga at pagpupunyagi sa tulong ng Tropang Bukid (MY Empi, Double Lights, Hito Beer, Black Shadow, Miguelito, Father) ay unti-unting dumami ang kanyang mga subscribers.

        Dahil sa pagtaas ng bilang ng kanyang mga followers, subscribers, at viewers, dahan-dahan ding natutupad ang mga pangarap ni Macki Moto. Nakabili siya ng lote, sasakyan, at nakapagpatayo ng magandang bahay. Gayunman, sa kabila ng kasaganaang tinatamasa at masayang ngiti sa mga labi, tila may madilim na ulap na pilit na tumatakip sa kanya. Ano ba ito?

        Natural na masayahin si Macki Moto. Namamalas ito sa kanyang mga bidyo. Pero nitong kalahatian ng taon ay napansin kong hindi na ganoon ang taginting ng kanyang pagtawa. Ang masayahing mukha ay dagling dumidilim. Ano kanya ang sanhi nito?

        Sa aking palagay, malaki ang kinalaman ng pamilya sa biglaang mananamlay ni Macki Moto. Sa palagay ko ay hindi pa rin sila nagkakaayos ni Camera Man, ang kanyang bayaw at asawa ng kaniyang nakababatang kapatid na babae. Sanhi ito upang magkaroon ng konting lamat sa relasyon niya sa kanyang kapatid at ina. Sa mga kasayahan, kaarawan man ito o Pasko, hindi ko nakitang kasama ni Macki Moto o naging bahagi ang kanyang ina at kapatid. 

        Maaaring nakaapekto din sa kalagayan ni Macki Moto ang pagkakawatak ng Tropang Bukid. Noong una, sinabing ang paghihiwalay ay upang makapagsarili ang isa't isa at patunayan ang kanilang mga sarili. Sa aking palagay, may nabuo talagang "SOMETHING" sa grupo. Bakit kanyo? Makikita kasing kina Miguelito, Hito Beer, at Father lang nakiki-join si Macki Moto. Maging ang kanyang bestfriend na si MY Empi ay unti-unting nawala sa eksena.

        Kung talagang walang nabuong "sigalot" sa Tropang Bukid, bakit hindi na sila makita sa mga happenings? Bakit hindi tinatawagan ni Macki Moto ang iba pang dating kasapi kung kailangan niya ang tulong sa bukid o saanman? Kung kaibigan pa nga niya ang iba pang miyembro ng Tropang Bukid, bakit wala man lamang Christmas party naganap sa grupo?

        Ang dalawang dahilan sa itaas ay sapantaha ko lamang. Ipinalalagay ko na ang mga ito ang mga dahilan kung bakit malungkot si Macki Moto sa kabila ng kanyang pagtawa at pangiti sa kanyang mga bidyo.

        Ngayong Bagong Taon, sana ay maging maayos na ang lahat. Kausapin ang pamilya at makipagkasundo. Hindi ka talaga magiging masaya kung wala kang pamilyang pag-aalayan o bahahaginan ng iyong tagumpay lalo na ang iyong ina. Hindi ka magiging masaya kung may mga tao o kaibigan kang iniiwasan gayong malaki ang bahagi nito sa iyong buhay.

        Sa ating lahat, Masaganang Bagong Taon mga Kabuddy!

Pagkalansag ng Tropang Bukid ni Macki Moto, Pera Nga Ba Ang Dahilan?

Inihayag ni Macki Moto sa kanyang vlog noong October 9, 2021 na paghiwa-hiwalay na ang Tropang Bukid. Kahit nabigla ang marami sa pahayag na ito, inaasahan ko nang mangyayari ang aking pinangangambahan dahil na rin sa paunti-unting pagsasalaysay ni Ka Buddy sa kanyang mga nakaraang vlog. Partikular na rito ang hindi pagsama ng ilang ka-tropa sa mga paglusong sa bukid nang hindi nagpapaalam. Naroon na rin ang pagkakabanggit ni Macki ng malaking gastusin buwan-buwan masuportahan lang ang kanilang YouTube channel.

Pero ano nga ba ang tunay na dahilan ng biglang pagkakawatak-watak ng Tropang Bukid?

Maaalala na sinimulan ni Macki Moto ang kanyang channel noong May 27, 2019. Sa simula ay may kinalaman lang ito sa mga motor kung saan kinuha ang pangalan ng channel. Kalaunan ay naiba na ang content nito hanggang mapokus sa mga gawaing bukid. May umalis at dumating na mga miyembro sa Macki Moto hanggang matira sila MY Empi, Father, Black Shadow, Double Light, Miguelito, at Hito Beer.

Dumami ang subscribers ni Macki Moto noong magsimula siyang mamigay ng tulong sa mga nangangailangan at sa mga kabarangay. Ang pagtulong na ito ay tila nahinto (o hindi na naisama sa vlog) nang magsimulang magpagawa ng bahay si Ka Buddy. Natatandaan na siya at ang kanyang pamilya ay nakatira lamang sa isang simpleng bahay sa kanyang pagsisimula sa YouTube. Bumili siya ng lupa at nag-renta ng isang apartment na malapit sa kanyang pinagagawang bahay sa ngayon. Dahil sa YouTube, ibinili rin siya ng kanyang misis (na nag-vlog na rin) ng isang pickup na gustong-gustong niya. Nabahagian din ng grasya ang kanyang mga ka-tropang bukid sa magandang kinikita ng kanilang YT channel. Nabigyan ang ilan ng salapi upang mapaayos ang kanilang bahay; ang iba naman ay binigyan ng lupang pagtitirikan.

Ang paglago ng Macki Moto ay naging inspirasyon ng mga miyembro ng Tropang Bukid upang magkaroon din ng YouTube channel. Hindi ko lang batid kung ito ay kanilang initiatibo o udyok ni Ka Buddy. Gayunman, unti-unti ay lumago rin ang kanilang channel. Sa kasalukuyan, narito ang bilang ng subscribers ng kanilang YouTube channel:

    1.  MY Empi Vlog                        -    25.1 K 
    2.  Black Shadow in the night      -     22.3 K
    3.  Hitobeer TV                            -    19.6 K
    4.  miguelito #kabuddy                -    15.7 K
    5.  Father and Son YT                  -    8.6 K
    6.  DOUBLE LIGHT OFFICIAL -    7.4 K

 Masasabing kumikita rin kahit papaano ang mga miyembro ng Tropang Bukid. 

Naging maayos ang samahan ng tropa subali't marami ang nakapansin nang unti-unting pagkawala ni Black Shadow sa grupo. Ipinagpalagay na ito ay sa kadahilanan ng kanyang pagkakasakit. Kung nakakasama man siya sa lakaran, tila hindi na siya iyong dating masayahin at punong-puno ng biro. Nitong mga nakaraang buwan, napansin na rin ang pagkawala ng iba pang miyembro. Hindi na sila nakumpleto. Hindi malaman ng manonood ang dahilan.

Sa kanyang video noong October 5, 2021, sinagot ni Macki Moto ang mga katanungan ng mga subscibers/viewers. Dahil dito, napansin kong tila hindi na maganda ang samahan ng Tropang Bukid. Hindi nagpapaalam o nagpapasabi ang ilang miyembro na hindi makakasama sa mga lakarin. Bilang namumuno, hindi maganda iyon kay Ka Buddy. Ipinahayag din sa bidyong iyon na magdaragdag ng bagong miyembro ang Tropang Bukid. Hindi na nga ako nabigla nang biglang ianunsyo ni Macki Moto na binuwag na pansamantala ang Tropang Bukid.

Sa video noong October 9, 2021, nagpasalamat sa mga subscribers ang miyembro ng Tropang Bukid. Sinabi roon na pangkalahatan ang kanilang desisyon na magkawatak-watak. Ipinahayag din na ginawa iyon upang mapag-aralan nila ang kanilang sarili  at sitwasyon, at matutong tumayo sa sariling mga paa. Nakangiti man, aninag sa kanilang mga mukha ang kalungkutan. Hindi ko tuloy alam kung ang kanilang sinabing mga dahilan ay ang tunay na dahilan.

Hindi kaya pera ang tunay na dahilan ng kanilang pagkakahiwalay?

Sa aking pananaw, may kinalaman din ang pera sa pagkakawatak-watak ng Tropang Bukid. Napansin ko kasi na simula nang magkaroon ng kani-kaniyang YT channel ang mga miyembro ng Tropang Bukid, unti-unti ring bumababa ang bilang ng views at subsribers nito. Ito ay ayon sa Social Blade.

Dahil sa pagbaba ng views, natural din na bumaba ang kinikita ng channel. Nabanggit din ni Ka Buddy na tamang-tama lang ang kanilang kinikita. Marahil, ito rin ang dahilan kung bakit hindi na sila masyadong nakatutulong sa mga nangangailangan. Kung tutuusin nga naman, LUGI si Ka Buddy sa nangyayari. Kasi nga, nagkakaroon ng dagdag kita ang ibang miyembro ng Tropang Bukid dahil sa kani-kanilang channel bukod sa kita nila sa Macki Moto channel. Natural lang na lumiit ang kinikita ni Ka Buddy gayong malaki ang kanyang bayarin buwan-buwan, lalo na nga at absent ang ilang miyembro sa kanilang lakarin.

Sana nga ay hindi salapi ang tunay na dahilan nang pagkakahiwalay ng Tropang Bukid. Sana sa muling paglaki ng kita ng channel ni Ka Buddy ay magtuonan na niya ang pagtulong sa kapuwa dahil sa palagay ko ay malaking dahilan ito kaya dumami ang kanyang mga subscribers at viewers, dagdag pa ang pagbibigay tulong sa kanya mula sa ating mga kababayang OFW at mga kababayan sa iba't ibang panig ng daigdig. 

Sana, kung may hindi man pagkakaunawaan ang Tropang Bukid ay maayos na agad. 

   

May Hidwaan Kaya Sina Macki Moto at Kian, The Cameraman?

Hindi po malisyoso ang inyong Mamay P subali’t napakalikot ng aking imahinasyon at biglang nakabuo ng isang haka-haka o akala. Noong una ay hindi ko masyadong binigyang pansin ang aking obserbasyo subali’t pagkalipas ng Pasko at Bagong Taon, tila unti-unting nabubuo ang aking hinala. Dagdag pa rito ang panonood ko ng mga video nina Macki Moto at Kian, The Cameraman.

Sa mga hindi nakaaalam, si Macki Moto ay Ang Promdi Vlogger ng Nueva Ecija na gusto ibahagi ang saya at hirap ng buhay magsasaka, welder, mekaniko, construction at tatay at simpleng pamumuhay. Isa po siya sa mga umaangat na vlogger na aking pinanonood sa YouTube. Noong una ay walang cameraman si Macki. Bigla ay dumating si Kian. Napag-alaman ko kalaunan na mag-bayaw pala ang dalawa dahil kapatid ni Macki ang naging kabiyak ni Kian.

(Image from Macki Moto's Facebook page)

Naging maayos naman ang naging samahan ng mag-bayaw sa kanilang mga vlog. Nagkaroon din ng mga tagahanga si Kian dahil sa kanyang ginagawa. Hindi ko alam kung kailan talaga biglang nawala sa eksena si Kian dahil magkaminsan ay late upload naman ang mga video.

(Image from Macki Moto's Facebook page)

Noong Nobyembre 2020 ay nag-vlog na rin si Kian, tulad din ng iba pang ka-buddy ni Macki Moto na sina HB o Hito Beer, Black Shadow, Miguelito, at nitong Enero 2021, ay si M. Y Empi naman ang sumabak. Alam kong walang koneksyon ang pagba-vlog ni Kian sa tila “hidwaan” nila ni Macki Moto dahil maayos pa rin naman ang kanyang naging trabaho bilang cameraman sa grupo.

(Image from Kian's Youtube Channel)

Mula sa Kian, The Cameraman ay naging Tigasing Kian ang titulo ng vlog ni Kian sa YouTube. Sa ngayon ay naging Kian & Sarah na ito na may 6.92K subscribers at 40 videos habang sinusulat ko ang artikulong ito.

Bakit naman nakabuo ang inyong Mamay P ng hinalang may hidwaan ang mag-bayaw? Una, napansin ko nang biglang mawala sa mga vlogs ni Macki Moto si Kian nitong malapit na ang Disyembre. Noong una ay sa pag-aakala kong dahil ito sa nalalapit na panganganak ng kapatid na babae ni Macki Moto at asawa ni Kian na si Sarah. Pangalawa, napansin ko sa vlog ni Kian noong Pasko na wala sa eksena si Macki Moto at pamilya nito. Pangatlo, wala rin sa eksena sina Ka-Buddy noong Bagong Taon. Wala rin sa eksena sina Kian at Sarah at pamilya nito sa ginawang Christmas Party ng grupo, sa selebrasyon ng Pasko at Bagong Taon sa mga video ni Macki Moto.

(Image from Macki Moto's Facebook page)

Sinubukan kong tanungin si Macki Moto sa kanyang Facebook page kung meron nga silang hindi pagkakaunawaan ni Kian pero hindi siya sumagot o kaya ay hindi niya nabasa ang aking mensahe. Sa kanyang Vlog# 32 na may titulong “NAGKITA KAMI NI KABUDDY (guess who?) + NAKUHA KO NA ANG PAINT NI KAPINTURA, lumikot na naman ang imahinasyon ng inyong Mamay P dahil tila may laman ang “guess who?” ni Kian.

(Image from Kian's Facebook page)

Well, kung mayroon mang kontrobersya sa pagitan ni Macki Moto at Kian, sana ay maging maayos ang lahat lalo pa at sila ay magkakapamilya. Hindi maiwawaksi ang ugnayan ng dugo nina Macki at Sarah dahil sila ay magkapatid. Sa palagay ko ay naapektuhan din ang relasyon ng iba pang miyembro ng kanilang pamilya lalo na ang ina ni Macki Moto. Hiling ko rin na mag-usap ang dalawa upang maplantsa ang lahat. Dahil mas nakatatanda si Macki, siya na ang umunawa sa isang mapusok na kabataan tulad ni Kian.

Inuulit ko, kung meron mang hidwaan sina Kian at Macki Moto, sana ay magkapatawaran na sila upang lalo pang yumabong ang kanilang YouTube channel.