RTD PH at KATROPAH OFFICIAL, Sino ang TAMA at Sino ang MAY TAMA?

Parang spaghetti itong usapan tungkol sa dalawang YouTube vloggers na kapwa natulungan ni Idol Japer Sniper. Ang reaction video ni RTD PH ay ginawan ng reaction ni KATROPAH OFFICIAL. Sinagot naman ni RTD PH ang mga pahayag ni KATROPAH na ginawan naman ng reaction ng iba pang vloggers na ginawan din ng reactions ng marami pang vloggers. Pati nga si Japer Sniper ay nagbalak na magsalita tungkol sa isyu subali't hindi niya itinuloy at na-PRANK lang ang maraming viewers.

Hindi ko na rin sana isusulat ang blog na ito pero tila lumalala ang sitwasyon. Marami na ang mga haka-hakang lumabas. Marami na ang gumawa ng sariling pag-aanalisa kahit wala sila sa pinangyarihan o hindi nila napanood o lubos na naunawaan ang mga binitiwang salita ng magkabilang kampo. Nakisawsaw na rin ang marami pang mga vloggers kaya lalo pang naging masalimuot ang isyu kahit na tumahimik na ang mga nasasanggot.

Sino nga ba kina RTD PH at KATROPAH OFFICIAL ang TAMA o MAY TAMA?

Para sagutin ito, hinimay ko ang mga binitiwang salita ng dalawang Bucana vloggers (kahit hindi roon talaga nakatira si RTD PH nguni't doon lumakas ang channel niya). In fairness kay RTD PH, wala naman akong napakinggang pananalita na tumutuligsa kina Japer Sniper, Louie TV, at Wasalak o Madi Katigbak Official. Kung baga, sinabi lang niya ang kanyang puna na hindi na ganoon kalaki ang views na tinatanggap ng tatlong vloggers nitong mga nakaraan nilang upload. Hindi nga siya nagsabi ng kung ano-ano ang dahilan kung bakit. Tila pansin lang ang kanyang ginawa at hindi isang paghuhusga o pamumuna.

Natural lang na mag-react si KaTropah Official sa mga pahayag ni RTD PH tungkol sa kanyang kapatid. Gannon naman tayong mga Pinoy, kapag kinanti mo ang isang kadugo ay buong angkan na ang iyong sinaktan. Sa kanyang reaction video, pinagtanggol na mabuti ni KaTropah si Wasalak na inaasahan na ng lahat ng manonood. Tumpak sana ito kung may nasabi ngang hindi kanasnais ang isang tao sa kanyang kapatid. Sa kanyang paglalabas ng saloobin, maraming paratang at paghuhusga ang pinakawalan ni KaTropah Official laban kay RTD PH. Sana naman ay totoo at may basehan ang mga paratang na iyon dahil baka lumala ang sitwasyon at mauwi pa sa demandahan ang lahat. Tulad ng nasabi ko, natural lang ang naging gawi ng kapatid ni Madi Katigbak. Kaya lamang, sana ay hindi na niya binanatan nang ganoon si RTD PH kung wala siyang sapat na ebidensya.

Maaaring nadala lang si KaTropah ng kanyang emosyon ng mga sandaling iyon. Marahil ay nais lang niyang ilabas ang kanyang nararamdaman sa taong sa palagay niya ay gumawa ng hindi mabuti sa kanyang kapatid. Mauunawaan iyon ng mga manonood na may malawak na pang-unawa subali't paano naman iyong madaling manghusga nang hindi pinag-aaralan ang mga pangungusap ng  magkabilang panig?

Kung gayon, sino kina RTD PH at KATROPAH OFFICIAL ang TAMA at MAY TAMA? 

Matapos kong analisahin at himay-himayin ang bawa't titik, salitang-ugat, salita, parirala, sugnay (makapagsasarili man ito o di-makapag-iisa), pahayag o pangungusap, ang aking konklusyon ay pareho silang TAMA. Kayo na lang ang bahala kung kanino ninyo idaragdag ang "MAY", matapos ninyong i-klik at panoorin ang kani-kanilang mga video sa ibaba:

RTD PH

KATROPAH OFICIAL

Dagdag ko pa, TAMA si Japer Sniper na huwag na lang ipahayag ang kanyang saloobin sa isyu sa pamamagitan ng social media. Mas mainam na talakayin ito nang harapan at masinsinan. Nawa ay matapos at magkasundo na ang dalawang panig dahil wala naman itong magandang patutunguhan. Sa nagkamali, tanggapin ito at humingi ng pasensya. Sa naagrabyado, magpakumbaba at magpatawad.

TAMA ba ako rito o MAY TAMA?

Bakit Pinapanood ko ang Vlogs ni Japer Sniper?

Simula nang pumaimbulog ang kaso ng mga nagkakasakit sa Covid-19 at maraming restrikyon ang ipinataw sa mga mamamayan ng pamahalaan sa Pilipinas man o sa ibang parte ng mundo, naging kabagut-bagot ang mga araw na nasa loob ka lamang ng bahay. Dahil dito, sinimulan ko uli ang pag-a-update ng aking mga blogs. Napag-trip-an ko rin ang panonood ng mga video sa You Tube at naingganyo na sumubok na ring mag-upload ng mga bidyo.

Isa sa napagtuunan ko ng pansin sa libu-libong channel sa YT ay ang vlog ni Jeffrey Agravante, na mas kilala sa tawag na “Japer Sniper”. Tama nga ang tawag niya sa kanyang mga tagasubaybay o subscribers na ka – “SOWEIRD” dahil kakaiba nga ang kanyang mga bidyo.

Noong una ay nayayamot nga akong panoorin si Japer Sniper dahil kung magkaminsan ay korny o mababaw ang kanyang mga jokes at mga parody na kanyang ipinalalabas sa kanyang channel. Gayunman, nagpatuloy ako bilang isang lihim na tagasubaybay.

Habang tumatagal, nagiging pursigido na akong panoorin ang kanyang mga bidyo. Ito ay hindi lamang dahil sa kanyang matining na pagtawa kundi sa laman ng kanyang puso. Nasaksihan ko ito nang ipamahagi niya ang parte ng kanyang unang kinita sa You Tube. Akala ko ay pansamantala lamang ang pagtulong na iyon subali’t nagpatuloy ito hanggang sa kasalukuyan.

Maliban sa kanyang mga ibinabahagi sa kanyang bidyo, hindi ko kilala si Jeffrey Agravante, a.k.a., Japer Sniper. Ang alam ko lang ay nagbuhat sa Visaya si Japer, dating private driver, may-asawa at 2 anak na babae. Siya ay nakatira ngayon sa Barangay Bucana, Nasugbu, Batangas.

Sadyang matulungin si Japer lalo na sa kanyang mga kabarangay at sa kapwa-vloggers. Ang pagtulong niya sa kanyang kapwa-vloggers ang isa sa mga dahilan kung bakit humina ang kinikita niya sa YT. Sa ngayon ay hindi ko na nakikitaan ng ads ang kanyang mga video. Marahil ay mayroon siyang paglabag sa panuntunan ng You Tube at/o Google Adsense na hindi pa niya binibigyan ng solusyon. Gayunpaman, nagpapatuloy siya sa pamamahagi ng kanyang araw-araw na pamumuhay para sa kanyang mga taga-subaybay kahit hindi siya kumikita. Nagpapatunay lamang ito na hindi ganoon kahalaga ang salapi kumpara sa kasiyahan ng kanyang mga subscribers.

Maliwanag din sa sinag ng araw ang pagmamahal ni Japer Sniper sa kanyang mga kabarangay. Sa isang streamed video, sinabi ni Japer na hindi mahalaga kung magalit man ang ilan niyang kaibigan na hindi niya mapayagang bumibisita sa kanilang barangay ngayong pandemya kung nakataya naman ang kaligtasan ng kanyang mga kabarangay. Pinayuhan niya ang kanyang mga tagahanga at kapwa-vloggers na ipagpaliban muna ang pagpunta sa kanilang bahay hangga’t mapanganib pa ang sitwasyon.

Bakit pinapanood ko si Japer Sniper? Simple… dahil tutoo siyang tao. Ang kanyang pagtulong ay kusa at bukal sa loob. Hindi naghananap ng kapalit. Inuuna niya ang iba kaysa sa kanyang pansariling pangangailangan. Hindi ba ga’t bibigyan niya ng tig-bebente mil na  cellphone ang anak ni Kuya Michael upang makapag-vlog din ito at kumita gayong nasa pagawaan ang kanyang lumang cellphone?

Isang simple tao na may malaking pangarap para sa kanyang pamilya at mga kabarangay. Iyan si Japer Sniper, si Jeffrey Agravante, isang ka-soweird na You Tube vlogger. Hindi sapat ang isang Sertipiko ng Pagkilala upang siya ay mahalin. Ang mahalin siya ng mga ka-soweird na tagasubaybay ay sapat na.

Panoorin po natin ang kanyang mga video at maging subscriber.

(Note: All images from Jeffrey Agravante (Japer Sniper) FB account)

PLEASE LANG, ‘WAG NA KAYONG MAGBIGAY NG ASO KAY JAPER SNIPER!

Walang tama ang Mamay P ninyo pero pakiusap, huwag n’yo nang bigyan ng aso si Jeffrey Agravante o mas lalong kilala sa Japer “Soweird” Sniper. Bakit ko nasabi ‘to? Aba’y huwag ninyo namang gawing pulubi ang ating idol sa hinaharap. 

(Zowie with Japer Sniper)

Batid kong mabait na tao si Japer Sniper at ang kanyang pamilya.  Tulad ng pagmamahal nila sa kanilang kapuwa, love din nila ang mga aso. Pero sana, maging praktikal naman tayo. Tama na siguro sina Zowie, Weirdy, at Pasty sa kanila. Napakamahal po kasi ng pakain at pagpapagamot sa mga aso. 

(Weirdy)

Oo, malaki ang kinikita ni Japer pero malaki rin ang inilalabas niya para matulungan ang ibang tao. Saka, hindi naman laging magiging ganito sa mga susunod na araw. So, ano ang payo ng inyong Mamay P? Dapat ‘yong mga pet company naman tulad ng Purina ang mag-sponsor kay Japer para sa kanyang mga alaga. Ganoon na rin ang gawin ng mga kumpanya na may kinalaman sa mga hayop para bigyan ng libreng gamot at bitamina ang tatlong aso. 

(Pasty)

Mas maganda rin siguro na ‘yong magbibigay ng aso, mag-donate din sila ng mga pakain nito. Huwag kayong magalit sa inyong Mamay P dahil inilalabas ko lang naman ang aking saloobin. Walang tama ang inyong Mamay P pero alam kong may tama sa mga sinasabi ko. Hanggang dito na lang mga Ka-Soweird!

(Note: Ang mga larawan ay pagmamay-ari ni Jeffrey Agravante a.k.a. Japer Sniper, mula sa kanyang Facebook Account)

Japer Sniper, Bumuhos ang Blessing

         Bumuhos ang blessing kay Jeffrey Agravante o mas lalong kilala bilang Japer Sniper sa YouTube at Facebook. Ang biyaya ay hindi nanggaling sa mga subscribers at followers ng sikat na vlogger kundi sa kanyang mga natulungan o siya ang ginawang inspirasyon upang maging vloggers na rin. Ang mga ito ay ang mga umaarangkadang vloggers mula sa Barangay Bucana, Nasugbu, Batangas kung saan kasalukuyang naninirahan si Jeffrey, kapiling ang kanyang misis at dalawang anak na babae.

(Image from https://www.facebook.com/japersniperofficial/photos/1787397871427053)

    Matatandaan na nauna na ng tumanaw ng utang na loob si Louie ng Louie TV nang magbigay itong ng isang bagung-bagong motorsiklo kay Japer. 

        Nitong nakaraang linggo nga ay nagbigay naman ng isang malaking refrigerator si Kamuning o Michelle ng Kuya Michael Official vlog. Sinundan ito ng Hansek na nagbigay naman ng isang aircon.

        Nahihiya man ay tinanggap din ni idol Japer ang mga regalong ng mga vloggers ng Bucana. Gayunman, nagpaalala siyang huwag nang gayahin pa ng iba pang Bucana vloggers na nakatakdang sumahod sa YouTube, ang ginawa ng mga nauna. Sinabi niyang pagtuunan muna ng mga Bucana vloggers ang kapakanan ng kani-kanilang pamilya dahil iyon ang kanyang unang layunin kaya hinikayat niya ang mga ito at tinulungan.

         Dahil sa pahayag na ito, sa halip na gamit sa bahay ay ulam ang ibinigay ni Kabugay sa mag-asawang Agravante. Nagluto ang ina ni Kabugay  o  Kate Winsleth ng sinaing na  tulingan para kay Japer at hipon naman para sa asawa nito.

(Image from https://easypeasypinoyrecipes.wordpress.com)

        Dahil sa pagbibigay ng mamahaling gamit nina Louie, Kamuning, at Hansek kay Japer, hindi naiwasang tanungin kung ano ang ibibigay ni Madi Katigbak o mas lalong kilala bilang Wasalak, kay Japer lalo't higit na siya ang unang hinikayat ni Japer na mag-vlog.

        Sa halip na si Japer ang binigyan, ang niregaluhan ni Madi ay ang asawa at 2 anak ni Jeffrey. Alahas ang binigay niya sa mga ito. 

        

        Sa aking palagay, tama lang na paalalahanan ni Jeffrey ang mga Bucana vloggers na mag-ipon para sa kanilang pangangailangan. Dapat nilang pagtuunan ng pansin kung paano nila palalaguin ang kanilang kinita at kikitain mula sa YouTube lalo na ngayon at walang katiyakan ang kita sa pagba-vlog at ang gusto ng mga subscribers. Dapat din nilang pagbutihin pa ang nilalaman o content ng kanilang mga vlogs upang dumami pa ang nanonood sa kanilang channel.

        Maganda ang layunin ni Japer sa kanyang pahayag upang hindi ma-pressure o ma-obliga ang iba pang mga Bucana vloggers na nakatakdang sumahod sa mga susunod na mga araw ang magbigay ng regalo sa pamosong si Japer Sniper.

        Kay Japer Sniper, Louie TV, at sa mga Bucana vloggers - Good luck po!