Sinampahan kahapon ng Bureau of Internal Revenue (BIR) ng Pilipinas ng kasong tax evasion si Congressman Mikey Arroyo at asawa nitong si Angela dahil sa hindi pagbabayad ng buwis ng ilang taon. Ito ay may halagang P73.85 milyon, kasama na ang interest at iba pang bayarin. Sinabi naman ng kinatawan ng Ang Galing Pinoy na ang paglabas ng kaso sa kanila ay isa lamang "gimik" at isang porma ng political harrassment para sa kanilang pamilya. Ginawa raw ito ng gobyernong Aquino dahil madalas maungusan ni Vice President Binay ang approval rating ni PNoy sa mga survey. Binatikos din ng anak ng dating Pangulong Gloria Macapagal Arroyo ang pagbili ni PNoy ng mga mamahaling sasakyan.
Sa isang panayam ngayon, bumuwelta si PNoy at sinabing hindi isang gimik ang kaso ng BIR dahil ito ay may sapat na ebidensya. Madali lang naman daw ang gagawin ni Congressman Mikey Arroyo upang pasinugalingan ang bintang ng pamahalaan. Ilabas daw nito ang kayang Income Tax Return sa mga taong binanggit ng ahensiya.
Sa aking palagay ay may malakas na ebidensya ng BIR sa pagsasampa ng kaso dahil kung hindi, isa itong malaking kahihiyan sa pamahalaang Arroyo. At kung tutoo ang bintang, dapat na pagbayaran ni Mikey ang kanyang hindi pagsunod sa batas. Dapat itong ikulong at magbayad ng kaukulang halaga. Kapag ito ay nangyari, walang dudang tataas ang approval rating ni PNoy dahil talagang ginagawa ng kanyang administrasyon ang tama at wala itong sinisino. Tungkol naman sa mamahaling kotse ni PNoy, wala namang kaso rito hangga't pera naman ng pangulo ang ginagasta. Sa kaso ng mga Arroyo, natural lang na mag-low profile lang sila sa paggasta at baka mabuking sila kung may kamalian man silang ginawa.
Sabi ng ni Kuya Kim Atienza, "Ang buhay ay weather-weather lang!"
