Nasaan ang LOAD Ko?

Ito ang palatak ni Senator Juan Ponce Enrile nang biglang nawala ang kanyang prepaid load na kalalagay lang niya ng maaga pa. Tila parang bulang nawala ang load. Napag-alaman ng senador na hindi siya nag-iisa sa pagtatakang ito. Ito ang naging dahilan upang busisiin ni Enrile ang mga telecom company upang ipaliwanag ang kababalaghang ito na noon pa nangyayari. Aalamin din niya kung bakit may "expiration date" ang mga prepaid load.

Sana ay makagawa ng panukalang batas ang magiting na senador para sa mangungurakot na ito ng mga telecom company. Aba'y parang pinagnanakawan ka na ng mga ito. Hindi naman pagkain ang mga load na kailangan pang lagyan ng expiration date at pagkatapos ay lamunin ng mga masisiba at dambuhalang telecom company (Globe, Smart, PLDT, etc.) Dapat nang matigil ang kawalanghiyaang ito! Kailangan lamang na hindi maging ningas-cogon ang bantang pagbusisi ni Enrile sa mga telecom company. Baka kasi kapag nabigyan siya ng libreng load ng mga ito ay bigla ring parang bulang mawala ang kanyang ganang pagbusisi at paggawa ng kaukulang batas upang matigil ang modus operanding ito.

YOU HAVE A TEXT MESSAGE!!!

Ineendorso ng mga Tongresista sa Tongreso ang pagbabawas ng singkwenta sentimos sa halaga ng pagpapadala ng mensahe sa pamamagitan ng text. Ibig sabihin, magiging singkwenta sentimos na lang ang pagpapadala ng text message kung ikaw ay nasa Pilipinas. Kung susuriin magandang balita ito sa mga consumer dahil mababawasan ang kanilang gastusin nguni't hindi sa mga kumpanyang PLDT, Globe at Smart dahil mababawasan ang kanilang tubo, na nangangahulugan din ng pagbaba ng koleksyon sa buwis ng gobyerno mula sa mga dambuhalang kumpanyang ito kung sila man ay nagbabayad ng tamang buwis at hindi nangungupit ang mga taga-BIR.

Kung ito ay pampapogi lamang ng mga Tongressman sa mga mamamayan dahil sa nalalapit na eleksyon, konsensya na nila ang bahalang sumagot. Kung pumasa man ito sa Kongreso at Senado at maging batas, wala namang makakapigil sa mga kumpanyang nabanggit na bawasan ang letra ng ipapadalang mensahe. Baka bawasan din ito ng singkwenta porsyento. Kapag nagkagayon, wala rin itong benebisyo sa mga mamimili.

Ang dapat isama ng mga mambabutas (ng kaban ng bayan) sa usaping ito ay ang PAGTANGGAL SA EXPIRATION o VALIDITY NG BINILI MONG LOAD. Ito ay tahasang pangingingil. Bakit nila mamadaling gamitin mo ang binili mong load gayong hindi naman ito pagkain na madaling masira? At kapag hindi mo nagamit at bigla na nilang kukunin. Di ba parang holdap ito?