Public Versus Private High School

Ewan ko ba kung bakit masyadong pinoproblema ng mga magulang kung saan nila ipapasok ang kanilang mga anak na tutuntong na ng high school. Ang iba kasi kahit na hindi kaya ng kanilang budget ay gustong-gusto pang ipasok sa private high school ang kanilang mga anak. Maganda raw ang turo roon. Sosyal! Ang masama, sila ang mababaon sa utang kahit na nga nasa-abroad pa ang asawa.

Ito ang nais kong pag-isipan ng mga Nanay sa Pinas, hindi porke nasa abroad si Mister ay gayon-gayon na lang na baguhin ang antas ng pamumuhay. Okay lang ito kung kaya pero kung makapagmayabang lang sa kapitbahay at kaanak ay hindi na maganda.

Kung hindi kalakihan ang sahod ni Mister sa abroad, para sa akin, tama ng sa public high school pumasok ang mga bata at ipunin na lang ang matitipid para sa kanilang pangkolehiyo. Ano ba ang mas mainam, private high school na hindi makakapasok sa college o public high school na maaaring magkolehiyo? Lalo na at karamihan sa mga college at university ay private.... at mataas pa ang tuition.

Mag-isip!